السبت، 18 ديسمبر 2010

كيف تحكي الكبار الصغار تعمل دور مصمار

أيا السلام عليكم واش حوالكم 


حديثك مع إلي ما يفهمكش إنقص من الأعمار والبهامة أو قلة التربية تكثر من الدمار، ناس قبل قالو ولد الفار يطلع حفار أو ولد الطير يطلع نقمار. مالا حضرو رواحكم أو أنصبولي رادار أما تأكدو إنو أنتم أو أفكاركم ماكومش باش تفوتو عتبة الجدار الفايس بوكي والشاهد عمار 404.

باسم الله بدينا وعلى نبينا محمد صلينا وإلي موش عاجبو يمشي علينا القصة أو ما فيها إنو ثم شكون دخل علينا بكسوة الحاج كلوف ياخي كلاتو الكفوف. لغة حرية التمخوير وإلي تقرب لضرب البندير متاع الملحدين و العلمانيين بعيدة برشة على حرية التعبير إلي يكرهوها الحمير ولأنو خناب الدجاج حط يدو على راسو وقت مالفنان Psyco-M حط معاهم راسو ولات الناس الكل تترعش أو بدت تخضرت من الغش. 
أو ما فهموش آش يعملو كيف إجيهم كش كش ناس تقول إنسيبوه أو ناس تقول خلوه إخش، أما المهم هو فجعان الذيب ما حاجتناش بقتلانو.

أوليدك جاك من تالي باش إذكرك في إلي نسيتو وي قلك يا بوهالي أرجع لأصلك  ولا تبالي الناس الدايرة بيك مايهماش فيك توا هاي قاعد إدبر عليك أما وقت ما تجي فيك لا ينفعك لا دولار ولا شيك.

يا مزين من برا واش حوالك من داخل هاو الخنار باين جهار نهار  و المسؤول ما عندو مايقول والدولة راقدة على وذنيها مولا الدار موش لهنا  قلة معروف في نسمة تي في أو ما تنسوش في برنامج عندي ما إنقلك الي كشف الي شطر صغار تونس ولدو جرت علاقات بدت بالجوال والغريبة الي قاعدين يبرمو في مبروم على مبروم وهو أمر محال برى مالا شوف الأسباب توا تلقاها حرية التمخوير الي ردت المرا تتباع او تتشرا.

"أي رني رني يا كرهبة كمال رني رني ماصابني كاسات فيك إنغني"  مالا  أقعد غني يا مغني أو خلي الشعب متهني مادام التلفزة والراديون ما يرضو كان على بو كانون وقت مايعبولو البيدون  بالفلوس والحلقوم، آنا إنقلو يا مغبر ظهرك أنفض الغبار علىظهرك وأعمل همة أو قيمة إلى صهرك العار حفار أو ماكش صغير باش تعرف الفرق بين محسن الشريف أو عمر المختار، رد بالك إغرك الدولار أو تتسبب في الدمار لجيل تربى على القران و الإحترام  أو حتى كان إنسى فيقو أو قلو أصلك اصلك لايغرك صاحبك  يا مكثر لصحاب يا متلف خيارهم. أما الفنان فنو أكبر برهان إما إغني على حاجة الديك للدجاجة وقتها إستني يا دجاجة لين إجيك القمح من باجة و إلا يكشف في المستور إلي متخبي في الكواليس أو حاطين عليه بوليس، إلي قال الفن حكاية ضوايا إنقلو برى لشركة الكهرباء اما الغاز لا، الفن رسالة و رسالة بنائة موش هدامة الفن توحدة بيه شعوب وتقربت بيه القلوب الفن هدف أو لا يكون فك علينا من لوغة العاشق المجنون و الفنان Psyco-M فنو ما جابش الجديد لكن ضرب بالحديد ضرب الأصل المجيد ضرب قلوب المسلمين موش باش يجرح الهدف كان باش إنحي الصديد إلي عمى بصيرة المسلم التونسي جراء وسائل الإعلام أو تحريف شعائر الإسلام قال إلكم هذا هو الدين أو إلي عندو راي آخر مسكين.

ننصحك بنيتي لا تخلطت الاديان عليك بدينك شيئ مايفيدك أسهل أمك على زمان البركة وقت ما كانت الحشمة أو ماكانش لحديث بالفرشة. زينتك في سترتك أو وهرتك في حشمتك أو قيمتك في دينك ما تبعش أولاد لحرام راهو حدث بيهم القران أو كيما تعرفت   لا يعجبك نوار دفلة في الواد عامل ضلايل أو لا يعجبك فكر الناس من قبل ما تشوف الفعايل أو إنت يا ولدي إنقلك الي الراجل مبادئ أو مواقف وتزيدهم الافكار موش الجال أو تركك إلدينك باش يعملك كار، رد بالك من الكفار راهم إحبو إخرجوك من ملة محمد المختار ويشوفو فيك النهار.






الخميس، 18 نوفمبر 2010

أعـلام لـكـن أقـزام

السلام عليكم و رحمة الله و بركاته


اليوم باش نحكو في موضوع الرجولية، هو بيني أو بينكم ثم فرق بين الرجولية  قبل و الرجولية توا و الله إقدر الخير من 2011. هو في زمان بوعنبة كيما تسمو فيه صحيح كان الفقر و الجهل و الإستعمار لكن الراجل كان فحل صنديد أهم حاجة في الدنيا شرفو أو كان الراجل إخمم في أهلو قبل مايخمم في روحو عمرو ما يتصوقت و إلا إذل مهما كان الأمر، يرضى إضحي بكل ما يملك من أجل مبدأ.

أما توا وينك ؟ قالو إلي الرجولية تحضر وتغيب و إنو شطر الرجلة خوف ونسو إلي الراس مايقسو كان ربي محسوب هاني فقيرا، لا دار لا دوار لا خدمة لا مرا  حياتي ضلمة، مالا؟ علاش خايف خصوصا كيف إنكون متأكد إني صحيح  آش باش إصيرلي أكثر من هكا ؟؟

والله ربي يهديكم. ساعات نعذر برشى ناس هاذا خايف على خديمتو أو هذا خايف من الضلم لا تجيه حكاية من حيث لا تعلمون (يوقع ، تلبسو قضية لا تقرا لا تكتب)  أما بورجولية قول لا، أي نعم لا و ألف لا قولها إلفكرة إحبو يفرضوها عليك قولها لخبر سمعتو في الأخبار قولها للمعلم إلي قلك راهو الإنسان أصلو قرد قولها للأستاذ إلي إقلك راهو كمال أتاتوك بطل و أسطورة قولها إلوالديك كيف إقولولك ولدي سيب عليك من الصلاة قولها للعون إلي قلك إشريلي دبوزة ماء. المهم قول لا حتى كيف تبدى وحدك قول لا لا لا لا 

قول لا للسيد هذا إلي قال ""لن أفتخر بإبنتي إن ضلت محتفظة بعذريتها" أو رد عليه  لاخر أو قلو" إذا ضلت إبنتي عذراء حتى زواجها سأعتبر أنني لم أحسن تربيتي لها"  أي نعم شيئ إحشم خصوصا كيف تصدر هالكلمات من مثقفين يمثلون البلاد أو هوما وجه لبلاد في العالم  أو موش كان هوما برشي غيرهم كيما سي النوري بوزيد إلي إحب إولي مشهور عالميا ولى ينتقد في الإسلام أو يفتي أعطيك بركة يرظو عليه أسيادو.

آنا إنقلو يا سيد إنت راك حر في روحك أو في بنتك و هذه أمور تخصك أو كيف طلعت لحكاية هكا الواحد يلزمو إرد بالو و راجع حساباتو مادام النخبة طلعو حكايتهم فارغا 
 ياخي الفساد و قلة الحياء إلى نتفرجو عليه لازمنى ؟ و إلا تحبو تزرعولنا في إمخاخنا إلي الزنا حرية من الحريات و الكلام في الدين من دون علم حرية من الحريات أو راهو عادي تصلي أو تسكر وعمل إلي تحب. لا يا سيد لا و ألف لا، ربي قال الحرام بين و الحلال بين أو موش إنتي إلي باش تفهمني في الإسلام و من تكون أنت؟ خليك في إطارك و لا تتجرأ على أمور أخري تتجاوزك (تفهم في الدين ؟ و إلا تفصل أو تلبس كيما تحب) موش لازم ربى يخلف في هالسلع هاذي إلي زعمة زعمة باش تنهظو بالبلاد و تحلولنا مشاكلنا ونتقدمو كيف البلدان لخرى.

آحنا ماذابينا نتطورو ونتقدمو أو راهو ما ناقصنا شيئ الكفاءات موجودة و الحمد لله أو كيف إنحبو إنقلدو الغرب ونواكبو العصر و الحداثة إنحافضو على هويتنا و أصولنا و تقاليدنا و إسلامنا ونتبعو الغرب في التطور التكنلوجي موش ناخو من عندهم قلة المعروف ونقولو هانا نواكبو في العصر ياخي العصر هذا هو إلي يتحكم فينا و إلا نحن إلي نتحكمو فيه يعجبكشي أمريكا و الغرب بصيفة عامة أصبحو مثال يحتذى به إلي إقولوه هوما لازم أحنا إنطبقوه شبيهم ماعطوناش التكنلوجيا و أسباب التقدم و إلا حلال عليكم حرام علينا قاعدين يبعثولنا كان في الفكر متاعهم، لا يا سيد أحنا مسلمين وفخورين عندنا الحشمة و القدر أو كان قلقك الإسلام أو تحب تبدلنا على ديننا إنقلك حاجة وحدة عرضلنا في الدورة ما عندك وين توصل لا أنت لا غيرك إلي شريتهم بالفلوس.

آنا حاجة وحدة إنقولها، الجماعة هاذي إلي كل مرة طالع منهم واحد بطلعة  ما نعرفش علاش كثرو هالأيامات راهم إمثلو كان أرواحهم  أو كيف تسمع واحد منهم يحكي على الفساد إلي يعتبر فيه هو تحضر و تطور راهو يقصد في الناس إلي إعيش معاها وإلي دايرين بيه ماهوش يقصد في بلاد كاملة أحنا التوانسة و الحمد لله فينا الدين وبناتنا تبارك الله أصيلات محترمات و عندنا رجال مازالت عندهم الكلمة والنخوة و يخافو على شرفهم رغم الفقر رغم كل الصعوبات لكنني أحترمه عندما أراه يعود لمنزله من العمل و على ثيابه الغبار خطواته ثقيلة فخورا بما جناه في يومه و يدعو الله في صباح و المساء ليجد زوجته أعدت له ما تيسر من الأكل مبتسمة في وجهه و إبنه بجانبه.



الأربعاء، 17 نوفمبر 2010

الـتشجيـع عـلى الـتـشغيـل

السلام عليكم

آش حوالكم يا ناس آنا عمكم عمار بو الزور من تونس، كيف كبرت وخذيت التقاعد بعد ما عديت حياتي قاعد قدام المعتمديات و مقر الولايات و مكاتب التشغيل قلت خليني نعمل هالمدونة هاذي إنفرغ فيها قلبي على الدمار إلى راتو عيني أو سمعتو وذني.

باهي آنا في مقام بوكم، أو كيف إنقلكم حاجة ونلوم عليكم ماتتغشوش عليا خاطر كلامي إنشاء الله إكون في مصلحتكم.
نبدو، توا موش عيب عليكم الدولة تبارك الله على المجهودات متاعها الجبارة إلي تسعى من وراها لتخصيص أكثر ما يمكن من مواطن شغل في إختصاصاتكم و كل يوم نسمع  في نشرة الأخبار اللى إدوم 30 دقيقة منها 25 دقيقة ليكم وحدكم "سيادة الرئيس يشجع على التشغيل، تم توفير 700 موطن شغل، التشجيع على الإنتصاب للحساب الخاص، بعث مشاريع جديدة ......" و أنتم راقدين تصبحو للعشرة متاع الصباح في فروشاتكم ياخي آش تحبو أكثر من التشجيع على التشغيل ؟ تحبو الدولة تجي تفيقكم من الفرشاتكم وتبنن عليكم "هيا فيقو هيا فيقو عيش وليداتي".

موش معقول بصراحة موش معقول عليكم، شنوا ذنب الدولة كيف إنت تقرا أو ما تلقاش خدمة تتماشي مع هواك إتصرف تحصلت على إجازة في الفيزياء و إلا رياضيات حل مشروع روضة مهندس ميكانيك حل حماص أستاذ عربية أخدم قهواجي . بربي قولولي، الدولة قالتلكم جيبولي أفكار مشاريع و خلو الباقي عليها، آش إهمها هي في التمويل الذاتي آشمدخلها كيف تبدى إنت متخرج جديد مازلت مخدمتش أو ماعندكش تمويل ذاتي و إلا بوك فقير وزيادة على ذالك موش أي مشروع تملو (على كيفكم) هي تعرف مصلحتكم أكثر منكم. بصراحة شيئ إحشم كل يوم ماشين للسيد المعتمد والسيد الوالي تحبو تبدلو لخدم أو هوما يعلم ربي بحالهم تاركين مصالحهم (إلي عندو السانية متاعو لاهي فيها وإلي يبني في دار ولدو على الثاني) أو يستقبلو فيكم و فرحنين بيكم و إنتم ما عاجبكم شئ تحبو كان على القعدة في القهاوي و الحواسة في الشوارع الشئ إلي خلاهم مساكن  إدخلو أولادهم يخدمو تصورو الأستاذ أستاذ و إلي في البانكة و إلي البوسطة تصورو ثم شكون تلزو أو حلو معامل لولادهم.

عيب، عيب  توصلونا لهل المواصل بصراحة شئ إحشم. ثم شكون أوصل يدفع في 10.000.000 لا لشيئ باش يقعد بطال أو ما ينجحش في الكاباس.

عملولكم الآليات التشغيل الكل، الآلية 12 و 13، 3.9، 481، 03 وإنتم ماكمش لهنا ياخي 150 دينار من عند الدولة ما تكفيش وزيدوكم 100 دينار من عند صاحب المشروع معناها 250 دينار

بربي لحظة نحسبوها  شدعندك:

1500( ركوب)  في     الشهر =  45000  
1000( كسكروت تن)  في  الشهر = 30000  
2200 (كانك مدخن)   في  الشهر  =  66000
600  (زوز قهاوي فيلتر)  في الشهر = 16500
1000( تلفون في الجمعة) في الشهر = 4000
2000 (دبوزة عطر سلعة ليبيا)
2500 ( حكة جال)
500 (صدقة لوجه الله)
بالطبيعة كانك كاري دار تزيد الحسبة 
 النتيجة 166.500 يبقالك 83.500 تبارك الله. موش نعمة هاذي ؟

الله يهديكم الشبعة موش باهية. الدولة تشجع وتعاود على التشغيل ونتوما ماتحبوش تخدمو عيب عليكم.


إنقللكم حاجة قبل ما نكمل 




تحيى تونس وذراراها أو سييدي المعتمد معاها أومحلى الشيخ كيف يبدى يشطح فاها